Economía circular e dinámica sectorial e territorial das actividades da reparación na Unión Europea e en Galiza

Neste traballo estudamos as implicacións socioeconómicas das actividades da reparación no ámbito da Unión Europea con atención especial á dimensión territorial das mesmas. O traballo consta dunha parte introdutoria; o desenvolvemento do corpo do traballo, onde facemos unha primeira parte de introdución teórica e unha segunda parte de análise empírica e a parte final do traballo, que inclúe as conclusións e as ampliacións. Os obxectivos do traballo son determinar as implicacións socioeconómicas e territoriais das actividades de reparación dende a perspectiva da economía circular. Tres son as preguntas que guían o traballo: Cal é o papel que se atribúe á reparación na literatura sobre economía circular e sustentabilidade? Cal é a situación das actividades de reparación en Europa, a evolución dos sectores e as súas características? Cal é a situación das actividades de reparación no ámbito territorial e rexional?