Bigarren generazioko antipsikotiko injektagarriak eskizofrenian

[EU] Sarrera: Gaur egun eskizofrenia gizarteko %1ek pairatzen duen nahasmendu psikotikoa da, eta hau tratatzeko erabiltzen den tratamendu nagusia farmakologikoa da, hots, antipsikotikoak. Administratzeko modu erabili bat depot izeneko muskulubarneko injektagarriak dira, iraupen luzeko antipsikotiko injektagarriak (ILAI), hain zuzen ere. Helburua: Eskizofrenia duten paziente helduetan Paliperidona (PAL) eta Aripiprazola (ARI), hilabete bateko iraupena duten 2 antipsikotiko atipiko injektagarrien efikazia neurtzea, pazienteek farmakoekiko duten atxikidura eta eurengan sortzen duten ongizatea (efektu terapeutikoak, ospitalizazio-tasak eta bigarren mailako efektuak) aztertuz. Metodologia: Lan hau berrikuspen bibliografiko bat da, Pubmed eta Scielo datu-baseetan bilaketak egin ziren. Barne- eta kanpo-irizpide batzuk definitu ziren, lanera hoberen egokitzen ziren artikuluen aukeraketa egin ahal izateko. Emaitzak: Hamar artikulu aukeratu ziren. Sei artikuluk atxikidura aztertu zuten, eta ondorioztatu zuten aho-bideko medikazioa baino atxikidura handiagoa zuela depot erako medikazioak. Horrez gain, pazientearen ongizatearen inguruko emaitzak bilatzean, ARI injektagarriak efektu terapeutiko handiagoak lortu zituen PAL injektagarriaren aldean. Ondorioak: Antipsikotiko injektagarri orok pazienteak farmakoarekiko duen atxikidura hobetzea lortzen dute. Euren arteko alderaketa egitean, efektu terapeutikoei dagokienez, ARI injektagarriak lortu zituen emaitzarik esanguratsuenak. Ospitalizazio-tasei eta bigarren mailako efektuei dagokienez, oraindik ez da hain argi ikusi zein den onuragarriena.