Search

Titulación: Licenciatura en Ciencia e Tecnoloxía dos Alimentos -- Materia: Química Inorgánica A presente unidade didáctica está dedicada aos elementos do grupo 14 da táboa periódica e os seus compostos. Céntrase no carbono e o silicio e nos seus compostos: hidruros, haluros, óxidos, oxoácidos e oxosales. Estes temas abórdanse despois de facer un repaso do que é a estrutura atómica, a táboa periódica e as súas propiedades, e os distintos tipos de enlace químico que axudarán a comprender mellor o comportamento destes elementos e reactividade destes e dos seus compostos. Obxectivos específicos da unidade didáctica VII: Búscase que ao rematar a unidade didáctica o alumno sexa capaz de: - Familiarizarse cos conceptos fundamentais de Química Inorgánica. - Conseguir a formación básica nesta disciplina, que os axude a enfrontarse ao resto das materias da titulación e, posteriormente, no desenvolvemento da súa actividade profesional. - Coñecer como se encontran na natureza os elementos do grupo 14 e dos seus principais compostos, así como a súa obtención e aplicacións. - Comprender o comportamento químico dos elementos do grupo 14, e dos seus compostos inorgánicos máis representativos, relacionando as súas propiedades coa súa estrutura e enlace. Universidade de Santiago de Compostela. Servizo de Normalización Lingüística

Titulación: Grao en Enxeñaría de Procesos Químicos Industriais -- Materia: Química Inorgánica A presente unidade didáctica abarca o Bloque VIII da materia Química Inorgánica, centrado na Química dos metais de transición e os seus compostos de coordinación. Este tema abórdase ao final do programa da materia, despois de facer un percorrido por algúns conceptos xerais da Química Inorgánica, pola Química dos elementos non metálicos e dos metais dos grupos principais. Nesta unidade didáctica faise un estudo da Química dos metais de transición máis relevantes a nivel industrial e biolóxico, centrándose na súa obtención, na reactividade, nas súas principais aplicacións e na súa Química de coordinación. Esta unidade didáctica, no que se refire a tódalas actividades nela propostas, está deseñada para ser desenvolvida ao longo de 14 horas. Preténdese que o alumnado, dado que a Titulación é o Grao en Enxeñaría de Procesos Químicos Industriais, adquira un coñecemento sistematizado por grupos dos elementos metálicos de transición e os seus compostos de coordinación máis importantes, mediante o exame dos seguintes aspectos: obtención, estrutura, propiedades físicas e químicas e reactividade. Tamén se pretende a adquisición de destreza para a aplicación práctica dos coñecementos acadados a casos reais, ademais de relacionar estes coñecementos directamente cos procesos industriais máis importantes. Universidade de Santiago de Compostela. Servizo de Normalización Lingüística

Titulación: Grao en Enxeñaría de Procesos Químicos Industriais -- Materia: Química Inorgánica A presente unidade didáctica está englobada dentro do tema do hidróxeno, Bloque II, e centrado nos hidruros, nome adoptado xenericamente para todos os compostos que forma o hidróxeno con outro elemento químico. Estes temas abórdanse despois de facer unha presentación do que é a Química Inorgánica e que temas aborda. Nesta unidade faise un estudo da auga, da súa importancia biolóxica e a nivel xeral, da súa utilización industrial, e dos procesos que implican a obtención de auga potable. A súa utilización como disolvente faina imprescindible en gran cantidade de reaccións químicas, polo que durante o desenvolvemento da materia será recorrente a súa utilización. A auga é o composto máis abundante na biosfera. A súa enorme importancia aparece resumida nas seguintes funcións: é o líquido que actuou como disolvente para que nel se desenvolvesen as moléculas da vida, é o compoñente maioritario nos seres vivos (valores entre un 65-95 % en peso), as súas específicas propiedades físicas e químicas fanlle ser de vital importancia biolóxica. Debido a estes motivos, aínda sendo un composto inorgánico, pode considerarse a auga como a molécula motor da vida, termo que parecería asociado a un composto de tipo orgánico. No noso planeta a vida sen auga sería inimaxinable. Pero ademais desta citada e importantísima función biolóxica a auga é tamén fundamental noutros procesos da vida diaria e tamén a nivel industrial, nestes procesos a función que realiza a auga xeralmente aparece asociada coas súas excelentes propiedades disolventes, de feito coñéceselle como o disolvente universal. Universidade de Santiago de Compostela. Servizo de Normalización Lingüística